Manifesto

Periferias Centrais ye un grupo anformal de trabalho que se dedica a pensar, fazer i tornar  bisible l’arte i la cultura an muitos centros. Stá ampenhado an melhorar las práticas de ls oufícios, l zambolbimiento renobable de las tierras i la pormoçon de la democracíe cultural. Ten l’eideia de antrebenir nas políticas públicas de la cultura.

Democracíe Cultural

Bulbemos a dezir que las ouportunidades de acesso a la partecipaçon cultural son un dreito. La democraçíe cultural ye eisencial pa la culidade de la democracíe política i, tal cumo eilha, debe ser ounibersal, plural, transpariente i pormober l’eigualdade, l’acessibilidade i la lhiberdade.

Artes

Bemos las artes cumo un spácio potencial de mudança, eiducaçon i trancendéncia. Déixan trabalhar la curjidade, l spírito crítico, la capacidade de scuolha i la aprossimaçon a outras bisones i realidades.

Quemunidades

Antendemos las quemunidades cumo  l sentimento de “nós”, manante i bariado, i l cumpromisso cun l tratar de l que ye “de todos”

Territórios

Miramos pa ls territórios cumo ecossistemas an renobaçon permanente, adonde defrentes quemunidades – houmanas, animales, begetales, bacterianas, birais, fúngicas… – stan lhigadas an relaçones de anterdependéncia.

Centralidades

Ponemos an causa ls nomes de “centro” i “periferia” i las raias antre eilhas. Todos ls lhugares tenen potencial i dreito de se zambulber i nun ser botados a la secundarizaçon, al eisolamiento i a la “anteriorizaçon”

Justícia

Acarditamos que las personas dében  ser tratadas cun justícia an todas las partes de la bida: ténen dreito a cundiçones de acesso al trabalho justo i a la berdadeira partecipaçon

Tiempo

Cunsideramos amportante ua bison critica de l tiempo i de la hiperpordutibidade, cuntemplando no calendairo l tiempo para star, scuitar i fazer, çcubrindo ls ritmos de ls bários territórios.

Colaboraçon

Ancaramos cumo eisenciales la criaçon i la troca de bários coincimentos antre muitos setores, antidades i personas. Defendemos ua relaçon nó hierárquica, ética, de prossimidade i cumbersa.

Feturo

Cuntribuímos pa la custruçon de un feturo cun mimória de muitas bozes i eimaginaçon selbática.

I la felcidade, adonde stá?

La felcidade stá na lhiberdade de criar, na custruçon de quemunidades, na bibéncia de la dibersidade, no cumbíbio antre defrentes miradas de l mundo, na partecipaçon de todas las personas, adonde quier que stéian.

Quien somos?

Este grupo anformal de trabalhos apareciu an 2018, cun l oubjetibo de pensar i zmascarar ls cunceitos de “centro” i “periferia”, eibidenciar l pensamiento crítico que eisiste an cada lhugar, partilhar eideias i métodos de trabalho, criar ua base de ajuda antre cumpanheiros.

An 2020, amostrou-se eibidente la ourgéncia de ancuontros de grupo que garánten maior regularidade a partir de Junho i passaran a cuntar cun la partecipaçon de mais struturas. Amostrou-se inda amportante la scritura de un manifesto, que define ls oubjetibos i percípios de l grupo.

Quien puode fazer parte i cumo

Qualquiera strutura cultural porfessional pertuesa que abraçe ls percípios de l manifesto de l grupo i que se cumpormeta an partecipar an pul menos, 2/3de las rouniones anuales – que, an média son 9. Bonda mandar un mail i apersentar gana an partecipar.